ÀTERAS LIMBAS

L'at organizadu sa Chambra d'Oc cun s'agiudu de sa Regione Piemonte, in intro de su Progetu Alpi 365. Sa traversada fata dae unu grupu de militantes de sa càusa otzitanista est cumintzada dae sas baddes otzitanas de su Piemonte e est agabbada in sa Badde de Aràn in Catalugna. Est cumintzada su 30 de austu de ocannu dae Vinadio e Pietraporzio, in sa badde cuneesa de su Stura. Su 7 de santandria, su biàgiu est agabbadu in  Vielha, in Badde de Aràn.
“Otzitània a pee” est istada un'ocasione de diàlogu intre sos pòpulos pro promòvere sa diversidade linguìstica e afortire sa dimanda fata a s'Unesco de decrarare sa limba otzitana “patrimòniu” mundiale de s'Umanidade.
Sos animadores de Chambra d'Oc, Dario Anghilante e Ines Cavalcanti, cun custa initziativa, ant chertu manifestare a totus custu ispàtziu linguìsticu e culturale situadu in su coro de Europa, chi includet 32 dipartimentos in sa Repùblica frantzesa, 12 baddes alpinas in Piemonte, unu tretu de Ligùria, sa Comunna de Guardia Piemontese in Calabria, sa badde de Aràn in Catalugna. In pràtica, 13 milliones de pessones chi tenet a cumone sa limba de OC.
“Otzitània a pee” est una mustra de sa cussèntzia in favore de sa limba otzitana chi agiuat finas a nois Sardos a crèere a beru chi sas limbas sunt su bene prus mannu pro sas natziones e pro s'umanidade.

> In sa fotografia: Dario Anghilante

[dsc]