ÀTERAS LIMBAS

Dae como, sos internàutas ant a pòdere bortare a sa limba galega sos testos e pàginas web cumpretas e, in su matessi tempus, ant a pòdere chircare paràulas crae in galitzianu chi ant dare pàginas web bortadas dae s'inglesu a su galitzianu.

Google est de su pàrrere chi sa tradutzione automàtica no est perfeta, però est un'agiudu pro "cale si siat pessone chi cheret intrare in Internèt e si fàghere un'idea generale de s'informatzione presente in limbas chi non connoschet".

Su tradutore de Google est a disponimentu in prus de 30 limbas, in mesu de custas su catalanu.

A cando su tradutore in sardu? Si sighit su pagu interessu chi tenent sas autoridades polìticas pro sa sorte e sa modernidade de sa limba nostra, amus a dèvere isetare meda, ca nos amus a dèvere basare in su traballu voluntàriu. Ma mancu custu paret una richesa a disponimentu nostru.

[red]