ÀTERAS LIMBAS

Gia dae unos cantos annos, su Comitadu 482, paris cun àteras realidades friulanas, su 27 de freàrgiu tzèlebrat sa Zornade Furlane dai Dirits (Die friulana de sos deretos). In custa data, difatis, cumbinat s'anniversàriu de su Giòvia 1511, cando est cumintzada sa rebellia populare friulana prus manna: un'eventu istòricu chi ammustrat unu pòpulu friulanu in gherra pro difèndere sos deretos suos.

Su Comitadu 482, nàschidu pro difèndere sos deretos linguìsticos e natzionales de sas comunides, ocannu est bastante pessamentadu ca arriscant de s'ispèrdere sos deretos linguìsticos chi sunt costados annos e annos de batallas democràticas. A 10 annos dae sa promulgatzione de sa Lege istatale 482, sos finantziamentos chi podent servire a fàghere a su nessi una parte de polìtica linguìstica sunt minimende a beru. Dae prus de 9 milliones de èuros istantziados in su 1999 semus arribbados, pro totu sas minorias de s'Istadu italianu a 4 milliones e 800mìgia èuros, in su 2009 ant a èssere 2 milliones e 274mìgia e, forsis, in su 2010 ant a torrare a 1 millione de èuros. Una cantidade de dinare ridìcula oe, comente pagu o nudda fiat su dinare postu in su cumintzu, in su 1999.

Galu peus est sa situatzione de sa Lege friulana, sa 29/07, blocada non dae s'impugnatzione ebbia de unos cantos artìculos fata dae sa Corte Costitutzionale ma mescamente pro neghe de sa Regione FVG chi no at fatu nudda pro bogare a campus sos regulametos chi bi cherent pro s'atuatzione sua.
In prus tocat a nàrrere chi s'Assessore regionale de como cheret modificare sa lege pro limitare e abbrandare normas giai previstas pro su friulanu in iscola e in s'amministratzione pùblica. In pràtica prus pagu dinare e prus pagu deretos.

Su C482 friulanu, pro totu custu, non si cheret rèndere ma, antis, est interessadu in custa die e dae como in antis, a mobilitare cantu prus gente si podet pro difèndere so deretos linguìsticos e culturales.

Radio ONDE FURLANE at a fàghere sa parte sua, trasmitende totu die intervistas e mùsicas dedicadas a su tema de sa Die.
[red]