Addòvios Benidores

Sa rivista  SardegnaVentirighe paris cun s’Ufìtziu de sa limba sarda de sa Provìntzia de s'Ogiastra organizant sa manifestatzione s'Atòngiu Literàriu.

Sa prima initziativa s'at a fàghere in Bòtidda su 6 de nadale a sas ses de bortaedie in sa sala cunsiliare de sa Comuna in carrera de Goceano 2. In cust'ocasione Bachis Solinas, cultore de limba e de cultura populare, at a presentare su libru S'arrempellu de Peppino Fogarizzu. Su romanzu faeddat de unu pastore sardu de una bidda minore de sa Sardigna tzentrale chi si bortat contra a sos meres, a su cunformismu e a sa polìtica fascista. «S’arrempellu» - si leghet in sa presentatzione - «si còllocat in un'època in ue sos fermentos de sas rivendicatziones de sas dotrinas sotzialistas noas chi si fiant difùndidas in sa sotziedade europea  de sa fine de s'Otighentos, istentaiant a nch'arribare  a sa periferia prus interna de sa Sardigna».

Sa de duas initziativas s'at a fàghere in Sìligo su 12 de nadale a sas ses de bortaedie in su tzentru de agregatzione sotziale in pratza “Maria Carta”. Juvanna Tuffu, de sa redatzione de SardegnaVentirighe, at a presentare su libru Addia (binchidore de su prèmiu “Grazia Deledda 2008) de sos autores Paola Alcioni e Antoni Maria Pala. Ant a èssere presentes sos autores de sos libros in ambas initziativas.

Cun custa manifestatzione, chi sighit cussa de su Beranu Literàriu, si cheret sighire cun s'intentu de valorizare sa limba sarda in s'àmbitu de sa literadura sarda in sas comunas de sa provìntzia de Tàtari chi ant aderidu a su progetu de polìtica linguìstica “In sardu, sa limba nostra”. Essende cuncordes cun s'Onu chi at proclamadu su 2008 comente annu internatzionale de sas limbas, si cheret promòvere sa limba sarda in totu sos àmbitos pro fàghere a manera chi si difundat in su campu de s'editoria, de sa literadura, de sa mùsica e de sa tzinematografia. 

Sa segreteria organizativa est cuidada dae Juvanna Tuffu de sa redatzione de SardegnaVentirighe.

[j. tuffu]