Addòvios Benidores

Su Dipartimentu de Filologia Catalana de s’Universitat Rovira i Virgili e s’ERLEU (Equip de Recerca en Llengua, Estructura i Ús de la URV) aiant organizadu in su 1998, in ocasione de sos 50 annos dae sa morte de Pompeu Fabra, su Collòchiu Internatzionale “La lingüística de Pompeu Fabra”. Chimbe annos a pustis, in su 2003, un’àtera editzione at cunfirmadu custa òpera de istùdiu.
Pro mantènnere custa traditzione, finas ocannu s’at a tzelebrare su de 3 collòchios internatzionale cun su tema “La lingüística de Pompeu Fabra”. Oramai est crara sa voluntade de propònnere unu forum periòdicu pro una riflessione profunda e plurale de totu sos aspetos de s’òpera de su protagonista de sa codificatzione de sa limba catalana.
Si tratat de riflessiones no agiogràficas ma sientìficas de s’òpera de Fabra. Pro medire finas s’atualidade e sa vigèntzia sua in s’àmbitu de sa pranificatzione linguìstica de como.
Sos Catalanos sunt a beru reconnoschentes, finas organizende custas dies de istùdiu, cun Fabra (Barcellona, 20 febbraio 1868 – Prades, 25 dicembre 1948), chi est istadu autore de sa codificatzione e istandardizatzione de sa limba catalana moderna.
In prus su Collòchiu si cheret cunfrontare cun àteras codificatziones e istandardizatziones de limbas neolatinas.
Est pro custu chi una de sas relatziones “non catalanas” est fata dae Diegu Corràine, diretore de s’Ufìtziu de sa Limba Sarda de Ogiastra, a propòsitu de “Sa Limba Sarda Comuna: caraterìsticas e istòria de unu protzessu. Sa relatzione sua at a èssere presentada giòvia 18 a sas 4 de merie.
Su Collòchiu tenet unu programa prenu a beru, dae su 17 su 19 de Nadale 2008, comente si podet bìdere leghende su programa aclùdidu, in pdf.
S’organizadore de s’eventu est su Departament de Filologia Catalana de sa Universitat Rovira i Virgili.
Su logu chi òspitat su collòchiu est su Palau Firal i de Congressos de Tarragona, C/ Arquitecte Rovira, 43001 Tarragona.

[red]