NOAS de sos ENTES

A sa premiatzione de su primu annu de su cuncursu "Contos de sa vida mea" ant leadu parte unas baranta pessones, chi ant sighidu pro duas oras sa letura de sos contos lèghido dae sos autores binchidores: Violetta Arangini de Lanusè cun «S'àbbila e su storitu», Mario Serafino Fronteddu de Durgali cun «Mannoi contat», Gabriele Comida de Biddamanna cun «In iscola apo cumintzadu», Marco Deiana de Loceri cun «Sas duas sorres», Antonio Piras de Nùgoro cun «Su "zucchero a velo"».
At abertu s'eventu una sonada de launeddas fata dae su loceresu Alessandro Podda.
Pro su primu annu sas òperas arribbadas sunt istadas 17. A sos premiados sos organizadores ant dadu un'atestadu, cun s'impignu chi intro de pagu tempus at a èssere publicadu unu libreddu cun sas chimbe òperas isseberadas. Difatis, non b'at prèmiu mègius de sa publicatzione, chi cunsentit a totu sa gente de apretziare sas calidades literàrias de sos contos e a sos autores de "faeddare" a sos letores.
Ant presentadu s'nitziativa su sìndigu de Loceri, Carlo Balloi, s'assessore de sa Cultura, Sergio Usai, su diretore de s'Ufìtziu de sa Limba Sarda de Ogiastra, Diegu Corràine.
Su Prèmiu fiat organizadu dae sa Comuna de Loceri e dae s'Ufìtziu de sa Limba Sarda de Ogiastra.
In s'istade chi benit, sos organizadores ant pessadu de fàghere un'ispetàculu in ue sos autores ant a lèghere sos contos e ant a dare su libreddu cun sas òperas de sa prima editzione de "Contos de sa vida mea".

[frantziscu secci]