Addòvios Passados

Dae pagas chidas sa provìntzia de Ogiastra e sa de Tàtari ant formadu su primu nùcleu de su Coordinamentu de sa Minoria linguìstica sarda, abertu a s'adesione de sas àteras provìntzias sardas.
Una de sas primas manifestatziones comunas at a èssere sa cunferèntzia de su 6 de maju de su 2009, dedicada a s'argumentu "TOPONOMÀSTICA, mustra bia de s'identidade nostra", chi s'at a fàghere in TÀTARI, Sala Angioi de sa Provìntzia, in pratza de Itàlia, dae sas 18 h 00 a sas 20 h 00
Ant a saludare: Alessandra GIUDICI, presidente de sa Provìntzia de Tàtari, Sergio MÙNDULA, assessore de sa Cultura de sa Provìntzia de Tàtari, Giorgio MURINO, assessore de sa Cultura de sa Provìntzia de Ogiastra
Ant a faeddare: Màuru MAXIA, istudiosu de limba sarda e Diegu CORRÀINE, diretore Progetu Rete “In Sardu, sa limba nostra e ULS Provìntzia de Ogiastra.
Su tema de sos Nùmenes de Logu est de atualidade manna ca sa lege 26/97 e sa 482/99 previdet sa possibilidade de torrare a sa toponomàstica autèntica in limba sarda, chi a s'ispissu est istada deformada giai in època catalana, ispagnola, italiana. Deformada in su sensu chi non semper sas grafias ufitziales ant ripsetadu sa pronùntzia locale e sarda. A bias, sos topònimos, mescamente sos nùmenes de sas biddas sunt istados bortados in ispagnolu (Iglesias) o in italianu (Villagrande).
Sas Leges como cunsentint de torrare a su connotu: Is Crèsias, Biddamanna, etc, E gasi cherent fàghere comunas e provìntzias, comente amus fatu in provìntzia de Nùgoro cun Otzana, Garteddi, Oroteddi, Durgali, Lòcula, etc.
Pro ite est importante a pònnere sos topònimos in sardu? Ca sunt sa prima cosa chi bidimus cando nos ponimus in caminu, est sa prima "iscritura" chi bidimus cando andamus a unu logu.